عندي صاحب، الله يصبحه بكل خير، مشكلته الاساسية انه راسه مربع، وكلشي ناتج من مشاكل، اله علاقة بهاي الحقيقة المثبتة علميا. فكل ما تحكي معه بموضوع بقلك “يا زلمة هني البنات صايرات ابصر كيف”. طيب ياخي انت اعرف كيف وبعدها احكي.. بعدين قلي شو مشكلتك مع نعمة الله؟ يعني ببلد فيها كلشي ماشي بالعكس; ولا في امن، ولا امان، ولا لقمة عيش، ولا مستقبل! الاشي الوحيد الي بخلينا نبتسم هني النسوان، بشو مش عاجبينك؟ قلي بس!
مشكلتي مع مشكلته هي انه ما في استناد الى اي معيار اكاديمي، يعني زي انك عم تقارن باللغة العربية وعم تساوي تشبيه وما في مشبه به، ك.. انت، ها؟ ماله القمر؟ بتعرفش تقول كالقمر انت؟ هو ذات المشكلة! صايرات يعني بدك تقلي “كيف كانت وكيف صارت” اعملي الترند او بنفع تفرجيني بتنرد 2016 مع انه اقسم بالله لو اعملك ترند 1967 رح تشوف انه ولاشي متغير، بتعرف عبارة “الشيء الثابت الوحيد هو التغيير” تغيرت وصارت “الشيء الثابت الوحيد هو النسوان”.
حلوة المقارنة، ككنافة نابلسية عند عمي ابو رابعة عالساعة 11 ونص بليلة من ليالي أيلول، تحديدا اليوم 21 منه لأسباب خاصة، بس تفضل قارنلي، صعب عليك تقارن لأنك يا ابو راس مربع لا بتقرأ كتب ولا بتحضر افلام ولا بتسمع اغاني، فانت حرفيا تفتقر الى المصادر تماما كما يفتقر النباتي للحديد والبي 12.
برجع شوي كم سنة لورا، مش كتير بس لسنة 1970 وبسمع عبد الحليم عم يقول بصوت كله عزة نفس، بلحن مربع الدرجات، “وفعز الكلام سكت الكلام…” وبكل دمع برجع بقول “رميت الورد طفيت الشمع يا حبيبي”، واذا برجع تلات سنين لورا، برضو من مصر، غسان كنفاني كتب لغادة رسالة، وبعبارة مربعة الكلمات اختصر كل الوجع “عزيزتي غادة، تم تشفير باقي الجملة” وختم الفقرة الأولى بجملة مربعة أخرى “ذلك سيزيدني تعلقا بك”. تحول المرأة من ملاك صعب الامتلاك لشبح، هو ظاهرة غير نادرة، هو الحالة الطبيعية الها اصلا يا حبيبي!
من هون منفهم انه على مر العصور، هني ما تغيروا، كل حياتهن يتصرفوا بذات الطريقة والأسلوب، وانت مش قادر تفهم عليهن ولا قادر تتأقلم معهن، المشكلة مش فيهن، هني هيك جايات من المصنع، المشكلة انك عم تتوقع منهن أسلوب تعامل اخر، نمط حياة مختلف عن شو هني، رغم انك عارف تماما شو هني من يوم يومهن، من يوم ستهن حوا لليوم، وانت لانك رجل شرقي في براسك صورة اخرى عم تحاول تطبقها، بس عمين؟ ترحش تبيع المي بحارة السقايين، هني عندهن مبدأ وما بتغيروا، انت بس كف عن التوقع، وكف عن محاولة تفرض توقعك عليهن، وكف عن انك تبكي عشان هني مش كيف انت بدك.. “شيل الفكرة من راسك أحلالك ليش بتجيب المشاكل لحالك” الحياة سهلة بس انتوا الزلام صايرين ابصر كيف!
